اتحادی حکومت دی اجتماعی بصیرت اتے دانشمندانہ حکمت عملی سیلاب دیاں تباہ کاریاں نال نبݨݨ اچ معاون ، وختی ریلیف اتے بحالی دے اقدامات کوں یقینی بݨایا ڳئے

اسلام آباد۔14دسمبر(اے پی پی):ملک دیاں وکھو وکھ جاہواں خاص طور تے سندھ تے بلوچستان اچ اجوکے طوفانی مینھ پاروں وݙے پیمانے تے تباہی تھئی اے جیں توں ملک دا تقریبا ھک تہائی حصہ متاثر تھئے،ݙوہیں صوبیں اچ کھڑیاں فصلاں تباہ تھی ڳئن ، سڑکاں ، پلاں دا ڈھانچہ متاثر تھیوݨ پاروں سیلاب متاثرہ علاقیں تئیں رسائی مک ڳئی ۔وزیراعظم شہباز شریف دی قیادت اچ اتحادی حکومت محدود وسائل اتے مشکلات دے باوجود اجتماعی بصیرت اتے دانشمندانہ حکمت عملی توں نہ صرف سیلاب توں متاثرہ علاقیں اچ قیمتی جاناں کوں بچائے بلکہ وختی ریلیف تے بحالی دے اقدامات کوں یقینی بݨائے ، جون 2022 توں شروع تھیوݨ آلیاں کوششاں دے تسلسل دے نال 6 مہینے تئیں جاری رہسن ۔ انہاں کوششاں پاروں سیلاب دیاں تباہ کاریاں دے ضیان نال نبݨݨ اچ مدد ملی ۔ ویلھا ونڄائے بغیر، حکومت نیشنل فلڈ رسپانس اینڈ کوآرڈینیشن سینٹر (این ایف آر سی سی ) بݨایا جیں اچ وفاقی اسٹیک ہولڈرز، صوبائی حکومتاں تے پاکستان دی مسلح افواج دے نمائندے شامل ہن۔ ایں فورم دا مینڈیٹ ساوݨ دے مینھ تے سیلاب نال نبݨݨ کیتے قومی کوششاں دی نگرانی تے ایں عمل کوں موثر بݨاوݨا ہئی ۔صوبیں اچ صوبائی پی ڈی ایم ایزدے ذریعے ھک موثر کوآرڈی نیشن بݨایا ڳیا تاں جو شراکت داری اچ بہتری گھن آئی ونڄ سڳے۔ ڈسٹرکٹ ڈیزاسٹر مینجمنٹ اتھارٹیز نال شراکت داراں دے درمیان ہم آہنگی توں وختی تے موثر معلومات دے تبادلے کوں یقینی بݨا تے ضلعی سطح تئیں مربوط تعاون یقینی بݨایا ڳئے۔اڄوکے ساوݨ اچ وݙے پیمانے تے سیلاب اتے لینڈ سلائیڈنگ دی وجہ توں انسانی جاناں، املاک اتے بنیادی ڈھانچے کوں ضیان پڄے۔حکومت پاکستان دی قیادت اچ اقوام متحدہ اتے انسانیت دی خدمت دے شراکت داراں دے تعاون توں متاثرہ علاقیں اچ لوکاں دی مدد کیتی ڳئی۔ سیلاب توں تقریباً 33 ملین لوک متاثر تھئن جیڑھے جو امداد دے منتظر ہن ݙوجھے پاسے اقوام متحدہ تے بین الاقوامی انسانی برادری 2022 دے پاکستان فلڈ رسپانس پلان دے تحت اڳلے چھی مہینے اچ پاکستان اچ تقریباً 5.2 ملین لوکاں تئیں پجݨ دا ارادہ کیتے ۔وفاقی وزیر موسمیاتی تبدیلی سینیٹر شیری رحمان آکھیے تباہی دا پیمانہ اتنا وݙا ہئی جو پہلی واری پاک بحریہ دے دستیں دی ساریں توں وݙی اندرلے ملک فیلڈ تعیناتیاں دے ذریعے امدادی اتے ریسکیو کارروائیاں کیتیاں ڳئن ۔ وفاقی وزیر دعویٰ کیتے جو پاکستان اچ غیر معمولی موسمیاتی سیلاب توں تھیوݨ آلے جانی تے مالی ضیان دا ناقابل تصور پیمانہ اے۔ انہاں ایں ڳالھ تے زورݙتے جو آفات دی شدت ساری پچھلی آب و ہوا دی آفات توں کتھائیں ودھ اے ۔وفاقی وزیر تجارت سید نوید قمر دا آکھݨ ہئی جو پاکستان تباہ کن سیلاب دے بعدمتاثرہ علاقیں دے لوک اپݨے جانی تے مالی ضیان دے بعد ݙکھی ہن ، انہاں ساریں کوں رلے گھن تے ٹرݨاں ہوسی ۔وفاقی وزیر آکھیے ملک اچ 2010 تے2011 اچ سیلاب آیا لیکن ھک ݙھاکے دے بعد اوھو تھئے جݙاں اساکوں اوھو چیزاں دہراݨیاں پوندن تاں اے گورننس ماڈل اچ غلط اے۔انہاں آکھیے دنیا ساݙی مدد کرے یا نہ کرے اساکوں آپݨے محدود وسائل دے اندر اپݨے لوکاں دی مدد کرݨی پوسی ۔ پاکستان اچ سیلاب توں تھیوݨ آلے ضیان دا تخمینہ 32 بلین ڈالر اے تے دنیا دا تخمینہ 16 بلین ڈالر اے لیکن کوئی نی ڄاݨدا جو کتنے فنڈزکٹھے تھیسن۔وزیر مملکت خزانہ و محصولات ڈاکٹر عائشہ غوث پاشا آکھیے پاکستان اچ سیلاب ودھ سارے معاشی ضیان چاتن، 50 لکھ توں ودھ حاملہ ماواں بے گھر ہن تے کھلے آسمان تلے ہن جیڑھا جو ھک وݙی آزمائش اے ، اقوام متحدہ اتے ڈونر ایجنسیاں تے دوست ملکاں امداد اتے بحالی دیاں کوششاں اچ مدد اتے تعاون کیتے۔سیلاب پاروں ملک دے مختلف علاقیں اچ 1,739 اموات تھئن، 12,867 لوک زخمی، 1,164,270 مال ڈھور مریے تے 2,288,481 مکانات کوں ضیان پڄے ۔84متاثرہ ضلعیں اچ بلوچستان دے 32، گلگت بلتستان دے 9، خیبرپختونخوا دے 17، پنجاب دے ترائے تے سندھ دے 23 ضلعے شامل ہن۔ اقوام متحدہ دے دفتر کوآرڈینیشن آف ہیومینٹیرین افیئرزدی پاکستان دی صورتحال دی رپورٹ حکومت، عطیہ ݙیوݨ آلے اداریں متعلقہ محکمیں دیاں آفتاں دے بعد دی صورتحال نال نبݨݨ کیتے کوششاں دا احاطہ کریندی اے ۔سندھ تے بلوچستان دے صوبیں اچ سطح سمندر دے تلے دے علاقیں اچ سیلابی پاݨی دے جمود پاݨی توں تھیوݨ آلیاں بیماریاں تے وبائی مرض دے کھنڈݨ اچ ودھارا کیتے ۔ پراونشل ڈیزاسٹر مینجمنٹ اتھارٹی سندھ دعویٰ کیتے جو 3 دسمبر تئیں صوبے اچ ھک اندازے دے مطابق 240,000 لوک بے گھر تھی چکے ستمبر دے شروع اچ اے تعداد 6.5 ملین ہئی ۔رپورٹ اچ آکھیا ڳئے جو سیلاب توں بے گھر تھیوݨ آلے تقریباً 90 فیصد لوک اپݨی برادریاں یا رشتہ داراں دے نال رہندے پئے ہن جݙاں جو باقی خیمہ وستیاں تے ریلیف کیمپاں اچ ہن ۔ رپورٹاچ زور ݙتا ڳئے جو چونکہ سیلابی پاݨی اچ کمی دے بعد لکھاں لوک آپݨے آبائی شہراں کوں واپس ٹر ڳئں لیکن انہاں علاقیں اچ سروسز بہترکیتیاں ونڄن تاں جو لوک زراعت دے ذریعہ معاش کیتے سوکھیں کم کرسڳن ۔رپورٹ اچ انکشاف تھئے جو ملیریا، ہیضہ، شدید پاݨی آلے اسہال اتے ڈینگی دے کیسز گھٹ تھیندے پئن ۔یو این او سی ایچ اے تخمینے دا دعویٰ اے جو خوراک دی عدم تحفظ اچ ناکامی توں 2023 دے شروع اچ اضافی 1.1 ملین لوکاں کوں ہنگامی مرحلے (آئی پی سی 4) اچ انٹیگریٹڈ فوڈ سیکیورٹی فیز دی درجہ بندی اچ داخل تھی ویسی ۔ سندھ دے دادو، قمبر، شہداد کوٹ، خیرپور، میرپور خاص، جامشورو، سانگھڑ، عمر کوٹ، بدین، شہید بینظیر آباد اتے نوشہرو فیروز جݙاں جو بلوچستان دے ضلعیں صحبت پور تے جعفر آباد حالی وی پاݨٰی وچ ہن ۔ یو این او سی ایچ اے دی رپورٹ اچ آکھیا ڳئے جو “اقوام متحدہ دے سیٹلائٹ سینٹر دی تصویراں توں اندازہ تھیندے جو 80 لکھ لوک حالی وی ممکنہ طور تے سیلابی پاݨی توں متاثر ہن یا سیلاب آلے علاقیں دے نیڑے رہندن ۔ورلڈ ہیلتھ آرگنائزیشن (ڈبلیو ایچ او) آکھیے سیلاب توں متاثرہ ٻہوں سارے ضلعیں اچ ملیریا، ہیضہ، شدید پاݨی دے اسہال دی بیماریاں تے ڈینگی بخار دے کیسز گھٹ تھیندے پن ۔مجموعی طور تے ، اکتوبر دے شروع اچ ملیریا دے 100,000 توں ودھ تصدیق شدہ کیسز توں گھٹ تھی تے تقریباً 50,000 تھی ڳئن ۔ پاکستان ہیومینٹیرین فورم دے ارکان 82 سیلاب توں متاثرہ ضلعیں اچ خوراک، پناہ گاہ، تعلیم، این ایف آئی، واش، نقد رقم، صحت اتے تحفظ اچ انسانی امداد دے ذریعے 3.8 ملین لوکاں تئیں رسائی ڳھدی ۔پاکستان ریڈ کریسنٹ سوسائٹی ، ریڈ کراس اتے ریڈ کریسنٹ فیڈریشن دے ذریعے 584,000 توں ودھ لوکاں تئیں پناہ گاہ، صحت، واش، خوراک اتے غیر خوراکی شعبیں اچ جان بچاوݨ آلی امداد پڄا چکی اے ۔ریڈکریسٹنٹ سوسائٹی پہلے مرحلے اچ زندگی بچاوݨ آلیاں خوراکاں ، پاݨی، طبی، اتے پناہ گاہ دی امداد کوں ترجیح ݙتی لیکن ہݨ صحت عامہ تے توجہ ݙیندا پـئے ۔